នេះ​ជា​ថេប្លេត​មាន​កាមេរ៉ា​ទម្លុះ​អេក្រង់​ដំបូង​គេ​បង្អស់​របស់ Huawei?

បើនិយាយទាក់ទងទៅនឹងរឿងកំពូលថេប្លេត ដែលអាចនឹងមានរចនាឡើងដោយបំពាក់កាមេរ៉ា ទម្លុះអេក្រង់ដំបូងគេបង្អស់ របស់ Huawei នោះ កាលពីលើកមុន គឺធ្លាប់បានចុះផ្សាយរួចម្តងទៅហើយ។  ដោយកាលនោះបង្ហាញថា Huawei កំពុងតែត្រៀមខ្លួនធ្វើការប្រកាសចេញនូវថេប្លេតជំនាន់ថ្មីនឹងមានឈ្មោះថា “MediaPad M7” ដែលមានការឌីហ្សាញអេក្រង់លាតពេញនៅសល់គែមអេក្រង់តិចបំផុត ស្រដៀងគ្នាទៅនឹង iPad Pro ហើយមានសន្ទះខាងក្រោយដូចជា Galaxy Tab S6។ 

ដោយឡែក ចូលមកថ្ងៃនេះ យើងក៏ទទួលបានរបាយការណ៍ថ្មីមួយទៀត ដោយមានការបង្ហាញពីកំពូលអ្នកយកសារព័ត៌មានបែកធ្លាយ គឺលោក Evan Blass បង្ហោះលើបណ្តាញសង្គម Twitter ថាថេប្លេតជំនាន់ថ្មី ឬក៏យើងអាចនិយាយបានថា កំពូលថេប្លេតដែល Huawei ត្រៀមនឹងដាកើបង្ហាញនាពេលខាងមុខនេះ នឹងមានឈ្មោះថា “Huawei MatePad Pro” ហើយវាមានឈ្មោះដំណាងថា “Marx”។ ម៉្យាងវិញទៀត យោងតាមប្រភព 91Mobiles បានបញ្ជាក់ឲ្យដឹងថា ថេប្លេតនេះ នឹងមានសេនស័រកាមេរ៉ាភ្លោះ ប៉ុន្ដែមិនទាន់បានបញ្ជាក់ថា ទំហំប៉ុន្មាននោះទេ ជាមួយភ្លើងជំនួយ LED Flash ទុកសម្រាប់ថតពេលងងឹត ព្រមទាំងមានរន្ធប្រភេទ USB Type-C, គ្មានរន្ធដាតកាស 3.5mm។ លើសពីនេះ បើយើងក្រឡេកទៅលើរូបភាពលេចធ្លាយនេះដែរ បង្ហាញឲ្យឃើញថា MatePad Pro នឹងមានជម្រើស 2 ពណ៌ ស និងខ្មៅ ជាពិសេស វានឹងអាចភ្ជាប់មកជាមួយក្ដារចុចឆក់ឆ្លាតវៃ ព្រមទាំងអាចគាំទ្រការប្រើប្រាស់ប៊ិច M-Pen ថែមទៀតផង។ 

សរុបមក រហូតមកដល់ពេលនេះហើយ មិនទាន់មានព័ត៌មានផ្លូវការណាមួយ ដែលបង្ហើបប្រាប់ពីវត្តមាននៃថ្ងៃប្រកាសចេញជាសាធារណៈឡើយ ចំណែកឯលក្ខណៈសម្បត្តិរបស់ Huawei MatePad Pro នេះ ក៏មិនទាន់មានដំណឹងជាក់លាក់ដែរ។ យ៉ាងណា យើងអាចព្យាករណ៍បានថា វានឹងដំណើរការដោយឈីបលំដាប់កំពូល Kirin 990 ជាមួយរ៉េមដល់ទំហំ 8GB + អង្គផ្ទុកទិន្នន័យដល់ 256GB ព្រមទាំងថាមពលថ្ម ទំហំធំជាដើម។ មិនតែប៉ុណ្ណោះ គេរំពឹងទុកថា វាក៏អាចនឹងរត់ដោយប្រព័ន្ធប្រតិបតិ្តការ Android 10 ជាមួយស្បែក EMUI 10 តែមិនអាចគាំទ្រដំណើរការជាមួយ សេវាកម្មនានារបស់ Google ដដែល ដូចទៅនឹងស៊េរីស្មាតហ្វូន Mate 30 អញ្ចឹងដែរ។ សូមបញ្ជាក់ផងដែរថា ទាំងនេះគ្រាន់តែជាកាប៉ាន់ស្មានទុកមុនតែប៉ុណ្ណោះ យ៉ាងណានឹងធ្វើការអាប់ដេតបន្ថែមទៀត នៅពេលដែលវាចេញផ្លូវការតែម្តង៕