ទស្សនាបណ្តុំរូបភាពសំខាន់ៗ ស្តែងពីព្រឹត្តិការណ៍អន្តរជាតិប្រចាំថ្ងៃទី០៩ ខែមករា ឆ្នាំ២០១៩!

(ពិភពលោក)៖ នៅថ្ងៃពុធ ទី០៩ ខែមករា ឆ្នាំ២០១៩នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖

១៖ ក្នុងរយៈពេល០៣ខែដំបូងនៃបេសកកម្មកែវយឺតអវកាស TESS របស់អង្គការ NASA ភពអេលៀនចំនួនបី និងបាតុភូតបន្ទុះស៊ូភើណូវ៉ាចំនួន ០៦ នៅក្រៅប្រព័ន្ធព្រះអាទិត្យយើង ត្រូវបានរកឃើញ និងជាលទ្ធផលដ៏គួរឲ្យរីករាយផងដែរ សម្រាប់វិស័យអវកាសជាសកល៕

២៖ បុរសពីរនាក់ និងស្រ្តីម្នាក់ត្រូវបានចាប់ខ្លួនពីបទប្រមាថព្រះចេស្តារអតីតព្រះមហាក្សត្រម៉ាឡេស៊ី ព្រះចៅ ស៊ុលតង់ មូហាំម៉េដ ទី ៥ (Sultan Muhammad V) ដោយសារការសម្រេចព្រះទ័យដាក់រាជ្យរបស់ទ្រង់ នាពេលថ្មីៗនេះ៕

៣៖ ប្រទេសថៃនាថ្ងៃពុធនេះបានសម្តែងការស្វាគមន៍ ចំពោះការសម្រេចចិត្តពីសំណាក់គណៈកម្មការអឺរ៉ុប ក្នុងការដកប្រទេសអាស៊ានមួយនេះ ចេញពីបញ្ជីឈ្មោះនៃប្រទេស ដែលរងការព្រមានជុំវិញសកម្មភាពនេសាទខុសច្បាប់ និងមិនមានការគ្រប់គ្រងត្រឹមត្រូវ៕

៤៖ រថភ្លើងពិសេសរបស់ប្រមុខដឹកនាំកំពូលកូរ៉េខាងជើង លោក គីម ជុងអ៊ុន បានធ្វើដំណើរចាកចេញពីរដ្ឋធានីប៉េកាំង នៃប្រទេសចិន ដើម្បីត្រឡប់ទៅកាន់ទីក្រុងព្យុងយ៉ាងវិញហើយ៕

៥៖ ក្រុមហ៊ុន Apple កំពុងកាត់បន្ថយការផលិតទូរស័ព្ទដៃ iPhone ស៊េរីថ្មីរបស់ខ្លួនទាំងបីម៉ូឌែលចំនួន ១០ភាគរយសម្រាប់ត្រីមាសទីមួយពីខែមករា ដល់ខែមីនា ឆ្នាំ២០១៩ បន្ទាប់ពីការលក់មានការធ្លាក់ចុះយ៉ាងគំហុក នៃការលក់ iPhone ស៊េរីថ្មីៗទាំងនេះកាលពីឆ្នាំ២០១៨៕

៦៖ យោធាអាមេរិកបានបាញ់សាកល្បងគ្រាប់កាំភ្លើងពិសេស Hyper Velocity ជាង ២០គ្រាប់ចេញពីនាវាពិឃាត USS Dewey ជាផ្នែកមួយនៃការសិក្សាស្រាវជា្រវ ដឹកនាំដោយកងនាវាអាមេរិក និងការិយាល័យសមត្ថភាពយុទ្ធសាស្ត្រនៃក្រសួងការពារជាតិ (SCO)៕